Elabu Etona Warang Chiti(𑢨𑢺𑢡𑢷𑢣 𑢨𑢵𑢩𑢳𑢡 𑢹𑢷𑢡𑢼𑢪 𑢯𑢢𑢵𑢢)

𑢨𑣕𑣉𑣈 𑢵𑣈𑣅𑣄:-[edit]

𑢨𑣕𑣉𑣈 𑣕𑣈𑣅𑣄 𑣈𑣞𑣃 𑣖𑣈𑣓𑣄𑣁𑣁 𑣌𑣑𑣁,

𑢡𑣚𑣉𑣖 𑣖𑣈𑣓𑣈 𑢭 𑣏𑣗𑣁^𑣙 𑣌𑣑𑣁,

𑢩𑣌𑣉𑣓𑣁 𑣌𑣉𑣖 𑣈𑣕𑣉 𑣙𑣃𑣓𑣑𑣂 𑣕𑣑𑣁,

𑢨𑣓𑣁 𑣙𑣂𑣞𑣗 𑣜𑣈 𑣌𑣌𑣉 𑣚𑣈𑣌𑣁 𑣕𑣑𑣁.

𑢨𑣕𑣉𑣈 𑣕𑣈𑣅𑣄 𑣔𑣉 𑣌𑣙 𑣋𑣈 𑣏𑣗𑣁𑣓𑣁,

𑢮𑣂𑣗𑣉𑣓 𑣙𑣉𑣜𑣁 𑣞𑣖𑣕𑣈 𑣕𑣃𑣓𑣑𑣃𑣓𑣁,

𑢮𑣃𑣔𑣂 𑣘𑣃𑣒𑣁𑣐𑣂 𑣋𑣈𑢶 𑣇𑣔𑣃𑣗𑣈𑣓𑣁,

𑢨𑣕𑣉 𑣕𑣑𑣅𑣉 𑣋𑣈 𑣕𑣖 𑣉𑣒𑣀 𑣏𑣗𑣁𑣓𑣁.

𑢴𑣂𑣝𑣃𑣖 𑣜𑣈 𑣏𑣉𑣚𑣉𑣓 𑣗𑣉𑣔𑣉𑣚 𑣕𑣓𑣁,

𑢨𑣕𑣉𑣈 𑣕𑣈𑣅𑣄𑣉 𑣓𑣖𑣁 𑣓𑣖𑣁𑣓 𑣕𑣓𑣁,

𑢸𑣘𑣁𑣜𑣂 𑣕𑣈𑣅𑣄 𑣋𑣈𑢶 𑣙𑣖𑣗𑣃𑣑 𑣕𑣓𑣁,

𑢳𑣖𑣁 𑣈𑣕𑣉 𑣔𑣉 𑣌^𑣙𑣋𑣈 𑣞𑣃𑣌𑣃𑣖 𑣕𑣓𑣁.

𑢨𑣕𑣉𑣈 𑣕𑣈𑣅𑣄 𑣜𑣈 𑣎𑣃𑣚𑣃𑣊 𑣖𑣈,

𑢫𑣃𑣜𑣃 𑣌𑣉 𑣎𑣘𑣄 𑣜𑣈 𑣕𑣆𑣓 𑣖𑣈,

𑢶𑣁𑣓 𑣖𑣆𑣓 𑣌𑣉 𑣈𑣖 𑣈𑣕𑣉𑣈 𑣖𑣈,

𑢳𑣖𑣁 𑣙𑣉𑣜𑣁 𑣗𑣑𑣌𑣉 𑣇𑣔𑣃𑣗𑣁 𑣖𑣈.

𑢨𑣕𑣉𑣈 𑣕𑣈𑣅𑣄 𑣔𑣉 𑣈𑣕𑣉𑣈 𑣖𑣈,

𑢷𑣛𑣂𑣎 𑣕𑣈𑣅𑣄 𑣌𑣉𑣔𑣉 𑣗𑣋𑣈𑣈 𑣖𑣈,

𑢳𑣖𑣁 𑣙𑣉𑣜𑣁 𑣔𑣉 𑣗𑣑 𑣞𑣗𑣈 𑣖𑣈,

𑢮𑣓𑣃𑣖 𑣏𑣉𑣋𑣁 𑣓𑣈𑣚 𑣆𑣔𑣂𑣆 𑣖𑣈.

𑢨𑣕𑣉𑣈 𑣕𑣈𑣅𑣄 𑣔𑣉𑣖 𑣙𑣅𑣁 𑣕𑣓𑣁,

𑢴𑣂𑣌𑣃 𑣋𑣈 𑣘𑣃𑣜𑣄 𑢶 𑣘𑣍𑣎𑣁 𑣕𑣓𑣁,

𑢸𑣂𑣒𑣂𑣌𑣁 𑣙𑣉𑣜𑣁 𑣔𑣉 𑣌𑣖𑣄 𑣕𑣓𑣁,

𑢸𑣒𑣈𑣑 𑣙𑣉𑣜𑣁 𑣖𑣃𑣚𑣂𑣖 𑣞𑣈𑣓𑣉𑣄 𑣕𑣓𑣁.

𑢨𑣕𑣉𑣈 𑣕𑣈𑣅𑣄 𑣔𑣉 𑣚𑣚𑣂 𑣋𑣈𑣅𑣁,

𑢾𑣜𑣂 𑣕𑣈𑣅𑣄 𑣋𑣈 𑣌𑣖 𑣓𑣖𑣈𑣅𑣁,

𑢴𑣂𑣌𑣃 𑣌𑣉 𑣈𑣓𑣌𑣁 𑣌𑣉 𑣎𑣚 𑣖𑣈𑣅𑣁,

𑢯𑣂𑣖𑣕𑣀 𑣞𑣅𑣉𑣗 𑣌𑣉 𑣖𑣈𑣕𑣁 𑣖𑣈𑣅𑣁.

𑢨𑣕𑣉𑣈 𑣕𑣈𑣅𑣄 𑣔𑣉 𑣞𑣚𑣁 𑣈𑣕𑣉𑣈 𑣖𑣈,

𑢮𑣁𑣕𑣂 𑣗𑣂𑣕𑣂 𑣜𑣈 𑣙𑣉𑣜𑣁 𑣖𑣜𑣝𑣚𑣈 𑣖𑣈,

𑢷𑣂𑣑𑣔𑣁 𑣗𑣃𑣔𑣂 𑣔𑣉 𑣗𑣑 𑣋𑣈 𑣈𑣕𑣉𑣈 𑣖𑣈,

𑢳𑣉𑣚𑣑 𑣕𑣈𑣔𑣉 𑣎𑣁𑣕𑣂 𑣁𑣚𑣉 𑣋𑣈 𑣁𑣁𑣗𑣈 𑣖𑣈....

𑢾𑣋𑣉𑣖 𑣌𑣈𑣓 𑣌𑣂𑣍 𑢹𑢢𑢼𑢺𑢡 𑢷𑢣𑢴𑢹𑢳 𑢾𑢢𑢪 𑢹𑢨𑢾𑢤.