International Mother Language Day!

 

𑢨𑣊𑣋𑣁 𑢹𑣁𑣅𑣁𑣖 𑢴𑣂𑣚𑣁𑣊 :-

𑢨𑣊𑣋𑣁 𑣙𑣁𑣅𑣁𑣖 𑣔𑣉 𑣖𑣂𑣈𑣑 𑣙𑣃𑣔𑣁 𑣜𑣈𑣁𑣄 𑣈𑣞𑣃 𑣖𑣁𑣜𑣁𑣊 𑣁𑣓𑣑𑣉𑣄 𑣈𑣞𑣃 𑣋𑣉𑣓𑣉𑣊𑣁𑣓 𑣎𑣂𑣓𑣂𑣞 𑣕𑣁𑣓𑣁 𑣏𑣂𑣓𑣁𑣄 𑣖𑣈𑣓𑣕𑣈 𑢹𑣁𑣅𑣁 𑣏𑣂 𑣌𑣁𑣎𑣂 𑣎𑣂𑣂𑣑 𑣕𑣁𑣆𑣓 𑣈𑣓𑣁𑣊 𑣋𑣈 𑣁𑣘𑣁𑣓𑣁𑣜𑣁𑣄 𑣖𑣁𑣓 𑣖𑣁𑣓𑣁𑣕𑣂𑣊, 𑣞𑣁𑣞𑣁𑣊𑣌𑣂𑣜 𑣁𑣓𑣑𑣉𑣄 𑣘𑣉𑣜𑣉𑣗 𑣘𑣉𑣓𑣁𑣆 𑣌𑣉 𑣎𑣂𑣂𑣑 𑣕𑣁𑣆𑣓𑣁. 𑢹𑣁𑣅𑣁𑣖 𑣈𑣓𑣌𑣁𑣓 𑣔𑣈𑣊𑣋𑣁 𑣈𑣖𑣁 𑣗𑣃𑣁 𑣉𑣌𑣉𑣓𑣁 𑣔𑣉 𑣙𑣁𑣕𑣃𑣆 𑣕𑣈 𑣈𑣅𑣉𑣗 𑣌𑣁𑣕𑣈  𑣔𑣂𑣝𑣃𑣖 𑣎𑣁𑣌𑣈𑣑 𑣜𑣈𑣁𑣄 𑣕𑣈𑣓𑣈𑣜𑣞𑣉 𑣜𑣈 𑣔𑣈𑣊𑣋𑣁 𑣈𑣖𑣈𑣁.

 

𑢨𑣊𑣋𑣁 𑣙𑣁𑣅𑣁𑣖 𑣜𑣈𑣁𑣄 𑣙𑣂𑣕𑣈𑣙𑣁𑣞𑣁 :-

𑢴𑣂𑣝𑣃𑣖 𑣜𑣈 𑣙𑣁𑣅𑣁𑣖 𑣁𑣓𑣑𑣉𑣄 𑣞𑣁𑣞𑣁𑣊𑣌𑣂𑣜 𑣜𑣈𑣁𑣄 𑣋𑣉𑣓𑣉𑣊 𑣞𑣉𑣖𑣎𑣁𑣉𑣓 𑣚𑣁𑣋𑣂𑣑 𑣋𑣈 𑣓𑣈𑣓 𑣉𑣕 𑣔𑣂𑣝𑣃𑣖 𑣈𑣊𑣋𑣁 𑣙𑣁𑣅𑣁𑣖 𑣔𑣂𑣚𑣁𑣊 𑣔𑣉 𑣖𑣁𑣓𑣁𑣕𑣂𑣊 𑣙𑣉𑣗𑣁𑣓 𑣕𑣁𑣓𑣁. 𑢦𑣇𑣓𑣈𑣞𑣌𑣉(UNESCO) 𑣢𑣡 𑣘𑣈𑣗𑣜𑣃𑣁𑣜𑣂 𑣡𑣩𑣩𑣩, 𑣜𑣈 𑢴𑣂𑣝𑣃𑣖 𑣈𑣊𑣋𑣁 𑣙𑣁𑣅𑣁𑣖 𑣔𑣂𑣚𑣁𑣊 𑣖𑣁𑣓𑣁𑣕𑣂𑣊 𑣚𑣁𑣋𑣂𑣑 𑣕𑣈 𑣑𑣁𑣌𑣁𑣜𑣁 𑣚𑣈𑣑𑣁. 𑢯𑣁𑣓𑣁𑣗 𑣕𑣈 𑣞𑣂𑣜𑣖𑣁 𑣢𑣠𑣠𑣠 𑣈𑣕𑣈 𑣋𑣉𑣒𑣁 𑣔𑣂𑣝𑣃𑣖 𑣜𑣈 𑣓𑣈𑣓 𑣔𑣂𑣓 𑣖𑣁𑣓𑣁𑣕𑣂𑣊 𑣌𑣉 𑣞𑣁𑣓𑣁𑣊 𑣚𑣈𑣓𑣁.

𑣢𑣠𑣡𑣡 𑣜𑣈𑣁𑣄 𑣙𑣉𑣛 𑣚𑣈𑣓𑣈𑣌𑣁 𑣜𑣂𑣘𑣉𑣜𑣒 𑣚𑣈𑣌𑣁𑣕𑣈 𑣁𑣗𑣃𑣁 𑣙𑣁𑣜𑣕𑣁𑣙𑣁𑣞𑣁 𑣜𑣈 𑣞𑣉𑣗𑣈𑣓 𑣖𑣂𑣞𑣁 𑣌𑣁𑣕𑣈 𑣡𑣩,𑣥𑣦𑣩 𑣌𑣂𑣞𑣃𑣖 𑣈𑣊𑣋𑣁 𑣙𑣁𑣅𑣁𑣖 𑣖𑣈𑣓𑣁𑣄𑣁𑣁. 𑣁𑣓𑣑𑣉𑣄 𑣓𑣂𑣖𑣂𑣓 𑣘𑣃𑣜𑣈𑣄 𑣙𑣁𑣅𑣁𑣖 𑣌𑣁𑣎𑣂 𑣎𑣁𑣋𑣁𑣜 𑣕𑣁𑣓 𑣙𑣉𑣛 𑣌𑣉 𑣕𑣁𑣚𑣁 𑣈𑣕𑣈 𑣁𑣗𑣃𑣁 𑢹𑣉𑣉 𑣖𑣈𑣓𑣁𑣄𑣁𑣁 𑣉𑣌𑣉𑣓𑣁 𑣔𑣉𑣉 𑢩𑣑𑣂𑣝𑣁, 𑢷𑣂𑣙𑣁𑣜, 𑢷𑣈𑣊𑣋𑣉𑣚, 𑢡𑣞𑣁𑣖, 𑢯𑣉𑣕𑣂𑣞𑣋𑣉𑣛 𑣁𑣓𑣑𑣉𑣄 𑢮𑣙𑣁𑣜𑣌𑣙𑣁𑣀𑣑 𑣜𑣈𑣓 𑣙𑣉 𑣌𑣉 𑣎𑣁𑣋𑣁𑣜 𑣕𑣁𑣓𑣁. 𑢨𑣓𑣁 𑣚𑣉𑣄𑣕𑣈 𑣁𑣌𑣉 𑢹𑣗𑣁𑣜𑣁𑣊 𑣏𑣂𑣕𑣂 𑣚𑣂𑣘𑣂 𑣕𑣈𑣌𑣉 𑣉𑣚 𑣕𑣁𑣓𑣁 𑣉𑣌𑣉𑣓𑣁 𑣔𑣉 𑣡𑣩𑣥𑣠 𑣜𑣈 𑢵 𑣋𑣃𑣜𑣃 𑣌𑣉𑣚 𑢺𑣁𑣌𑣉 𑢷𑣉𑣔𑣜𑣁 𑣕𑣂𑣌𑣂𑣍 𑣘𑣁𑣍𑣎𑣁 𑣓𑣁𑣖 𑣚𑣈𑣑𑣁.

𑢡𑣗𑣃𑣁 𑣔𑣂𑣝𑣃𑣖 𑣜𑣈𑣁𑣄 𑣎𑣁𑣁𑣓 𑣎𑣈𑣕𑣁𑣓 𑣌𑣁𑣎𑣂 𑣗𑣃 𑣈𑣕𑣉 𑣔𑣁𑣆𑣁 𑣁𑣓𑣑𑣉𑣄 𑣙𑣁𑣅𑣁𑣖 𑣋𑣈 𑣁𑣗𑣃 𑣖𑣂𑣈𑣑 𑣙𑣉 𑣚𑣉𑣄𑣕𑣈 𑣞𑣁𑣋𑣁𑣆 𑣜𑣂𑣌𑣈 𑣚𑣁𑣋𑣂𑣑 𑣔𑣈𑣊𑣋𑣁 𑣈𑣖𑣁 𑣗𑣃𑣁. 𑣁𑣗𑣃𑣁 𑣖𑣉𑣓𑣜𑣈 𑣎𑣁𑣁𑣓𑣁𑣄 𑣗𑣃 𑣇𑣛𑣃𑣆 𑣕𑣁𑣓𑣁 𑣈𑣓𑣁 𑣈𑣒𑣁𑣄 𑣙𑣉 𑣚𑣉𑣄𑣕𑣈 𑣙𑣁𑣒𑣂𑣊 𑣔𑣁𑣆𑣉𑣄𑣁𑣁 𑣁𑣓𑣑𑣉𑣄 𑣁𑣗𑣈𑣓𑣁 𑣇𑣛𑣃𑣄 𑣜𑣈𑣁𑣄 𑣌𑣁𑣎𑣂 𑣁𑣌𑣂𑣍 𑣕𑣁𑣄𑣕𑣈 𑣗𑣈𑣒𑣁𑣈 𑣚𑣁𑣋𑣂𑣑 𑣓𑣈𑣓𑣁 𑣋𑣈 𑣖𑣂𑣈𑣑 𑣙𑣉𑣜𑣁 𑣕𑣁𑣓𑣁. 

𑢹𑣉𑣉 𑣌𑣉 𑣁𑣘𑣁𑣓𑣁𑣜𑣁𑣄 𑣙𑣁𑣅𑣁𑣖 𑣗𑣁𑣋𑣈 𑣕𑣁𑣈𑣕𑣈 𑣈𑣒𑣁𑣄 𑣙𑣁𑣅𑣁𑣖 𑣕𑣈 𑣚𑣁𑣓𑣔𑣁 𑣎𑣁𑣋𑣁𑣜 𑣈𑣞𑣃 𑣗𑣃 𑣜𑣁𑣀𑣞𑣁 𑣕𑣁𑣓𑣁, 𑣓𑣈𑣚𑣈𑣌𑣁 𑣈𑣞𑣃 𑣒𑣁𑣈𑣑 𑣜𑣈 𑣓𑣈𑣚 𑣓𑣁𑣖𑣉𑣄 𑣕𑣁𑣓𑣁 𑣏𑣂 𑣁𑣌𑣉𑣁𑣄 𑣙𑣁𑣅𑣁𑣖 𑣕𑣈 𑣎𑣁𑣋𑣁𑣜 𑣌𑣁𑣌𑣉 𑣞𑣁𑣓𑣁𑣊 𑣕𑣁𑣓𑣁. 𑢳𑣈𑣚𑣈𑣌𑣁 𑣘𑣁𑣆𑣒𑣂 𑣌𑣉𑣕𑣈 𑣁𑣗𑣃𑣁 𑣙𑣁𑣅𑣁𑣖 𑣞𑣃𑣖𑣁𑣊 𑣁𑣑𑣉𑣄 𑣕𑣁𑣓𑣁 𑣈𑣓𑣁𑣔𑣉 𑣌𑣁𑣁𑣋𑣈 𑣙𑣁𑣅𑣁𑣖 𑣚𑣉𑣄𑣕𑣈 𑣞𑣁𑣋𑣁𑣆 𑣖𑣈𑣓𑣁𑣄 𑣕𑣁𑣓 𑣞𑣉𑣗𑣈𑣓 𑣖𑣁𑣓 𑣖𑣁𑣓𑣁𑣕𑣂𑣊, 𑣞𑣁𑣞𑣁𑣊𑣌𑣂𑣜 𑣁𑣓𑣑𑣉𑣄 𑣘𑣉𑣜𑣉𑣗 𑣘𑣉𑣓𑣁𑣆 𑣌𑣉 𑣁𑣑 𑣏𑣁𑣗𑣁𑣓𑣁. 𑣉𑣌𑣉𑣓𑣁 𑣔𑣉 𑣁𑣗𑣃𑣁 𑣞𑣉𑣖𑣁𑣎 (𑣙𑣃𑣔𑣁) 𑣚𑣁𑣋𑣂𑣑 𑣕𑣈 𑣁𑣓𑣑𑣉𑣄 𑣔𑣂𑣝𑣃𑣖 𑣚𑣁𑣋𑣂𑣑 𑣕𑣈 𑣈𑣞𑣃 𑣖𑣁𑣜𑣁𑣊 𑣔𑣃𑣌𑣃 𑣜𑣈𑣁𑣄 𑣌𑣁𑣎𑣂 𑣙𑣉𑣗𑣁𑣓𑣁.

𑢨𑣓𑣁 𑣖𑣈𑣓𑣕𑣈 𑣞𑣉𑣗𑣈𑣓 𑣚𑣈𑣌𑣁𑣓 𑣌𑣃𑣜𑣃𑣑𑣃𑣜𑣃 𑣌𑣉𑣜𑣈 𑣁𑣗𑣃𑣁 𑣈𑣊𑣋𑣁 𑣙𑣁𑣅𑣁𑣖 𑣜𑣈𑣁𑣄 𑣋𑣉𑣓𑣉𑣊 𑣓𑣃 𑣏𑣂𑣜𑣋𑣁𑣚 𑣓𑣁𑣖𑣈𑣏𑣁 𑣁𑣓𑣑𑣉𑣄 𑣓𑣈𑣓𑣁 𑣏𑣂𑣚𑣂𑣌𑣈 𑣕𑣈 𑣁𑣗𑣃 𑣞𑣉𑣗𑣈𑣓 𑣔𑣂𑣓 𑣚𑣁𑣋𑣂𑣑 𑣎𑣂𑣂𑣑 𑣎𑣉𑣋𑣁𑣉𑣅𑣁 𑣓𑣈𑣓 𑣖𑣁𑣓 𑣎𑣁𑣋𑣁𑣜 𑣌𑣉 𑣙𑣉𑣗𑣁𑣓 𑣕𑣈𑣁𑣄 𑣈𑣞𑣃 𑣔𑣉𑣜𑣌𑣁𑣜 𑣖𑣈𑣓𑣁𑣄𑣁𑣁. 𑣁𑣗𑣃𑣁 𑣌𑣁𑣎𑣂 𑣌𑣁 𑣙𑣂𑣚𑣈𑣞𑣁𑣚𑣁 𑣌𑣁𑣕𑣈 𑣏𑣂𑣚𑣂𑣌𑣈 𑣔𑣂𑣝𑣃𑣖 𑣋𑣉𑣒𑣁𑣜𑣈 𑣙𑣁𑣅𑣁𑣖 𑣜𑣈𑣁𑣄 𑣇𑣓𑣃𑣜𑣃𑣖 𑣗𑣃 𑣓𑣁𑣖𑣈𑣁 𑣈𑣓𑣁 𑣏𑣈𑣕𑣁𑣓 𑣜𑣈 𑣇𑣛𑣃𑣆 𑣕𑣈𑣁𑣄 𑣁𑣗𑣃𑣁 𑣘𑣁𑣆𑣒𑣂.

𑢴𑣂𑣝𑣃𑣖 𑣈𑣊𑣋𑣁 𑣙𑣁𑣅𑣁𑣖 𑣔𑣂𑣚𑣁𑣊 𑣚𑣈𑣌𑣁𑣓 𑣔𑣂𑣓 𑣜𑣈  𑣞𑣉𑣗𑣈𑣓 𑣌𑣉 𑣜𑣁𑣀𑣞𑣁 𑣜𑣁𑣞𑣂𑣌𑣈 𑣎𑣉𑣙𑣁𑣜 𑣈𑣓𑣁 𑣚𑣉𑣄𑣕𑣈 𑣁𑣗𑣃 𑣞𑣉𑣗𑣈𑣓 𑣌𑣉𑣁𑣄 𑣘𑣁𑣆𑣒𑣂  𑣙𑣉𑣗𑣁𑣉 𑣕𑣁𑣓𑣁 𑣁𑣗𑣃𑣁 𑣙𑣁𑣅𑣁𑣖 𑣕𑣈𑣜𑣞𑣁𑣉 𑣜𑣈 𑣏𑣂𑣚𑣂𑣌𑣈 𑣘𑣁𑣆𑣒𑣂 𑣌𑣉 𑣞𑣈𑣞𑣈𑣓 𑣕𑣁𑣓𑣁 𑣈𑣓𑣁 𑣌𑣉𑣗𑣃 𑣓𑣈𑣚 𑣓𑣈𑣖𑣈𑣁 𑣁𑣓𑣑𑣉𑣄 𑣈𑣓𑣁 𑣚𑣁𑣋𑣂𑣑 𑣕𑣈𑣗𑣃 𑣌𑣃𑣜𑣃𑣖𑣃𑣒𑣃𑣓𑣁.