Eta: Ko Nelte Ho Poetry. Warang Chiti

𑢽𑣂𑣝𑣃 𑢬𑣗𑣉𑣅 𑢱𑣉𑣋𑣉𑣜- "𑢨𑢲𑢤 𑢬𑢩 𑢳𑢨𑢺𑢵𑢨"[edit]

• 𑢨𑣒𑣄 𑣌𑣉 𑣓𑣈𑣚𑣕𑣈 𑣁𑣚𑣉𑣖 𑣖𑣖𑣜𑣀,

𑢡𑣌𑣉 𑣕𑣚𑣁𑣜𑣈 𑣁𑣚𑣉𑣖 𑣏𑣂𑣖𑣜 𑣏𑣒𑣀.

𑢡𑣚𑣉𑣖 𑣌𑣎𑣂 𑣗𑣁𑣅 𑢶'𑣄 𑣋𑣈 𑣞𑣃𑣖𑣀,

𑢶𑣀𑣑𑣂 𑣔𑣉 𑣁𑣚𑣉𑣖 𑣎𑣉𑣖𑣈 𑣑𑣃𑣖𑣀.

• 𑢨𑣒𑣄 𑣌𑣉 𑣓𑣈𑣚𑣕𑣈 𑣁𑣚𑣉𑣖 𑣘𑣉𑣒𑣁𑣐𑣂,

𑢨𑣊𑣋𑣁 𑣙𑣅𑣖 𑣁𑣚𑣉𑣖 𑣙𑣂𑣐𑣂 𑣞𑣂𑣐𑣂.

𑢼𑣌𑣗 𑣆𑣔𑣂𑣓 𑣖𑣈 𑢶 𑣞𑣉𑣗𑣈𑣓 𑣞𑣂𑣐𑣂,

𑢬𑣃𑣛𑣖 𑣔𑣉 𑣗𑣆𑣖𑣈 𑣞𑣅𑣌𑣁 𑣏𑣒𑣁𑣐𑣂.

• 𑢨𑣒𑣄 𑣌𑣉 𑣓𑣈𑣚𑣕𑣈 𑣁𑣚𑣉𑣖 𑣕𑣃𑣞𑣂𑣊𑣈,

𑢨𑣒𑣄 𑣚𑣈𑣌𑣁 𑢶 𑣈𑣒𑣄 𑣌𑣉 𑣓𑣈𑣚𑣕𑣈.

𑢹𑣉𑣉 𑣙𑣉𑣓'𑣄 𑣇𑣓𑣃𑣜𑣃𑣖 𑣗𑣆𑣖𑣈,

𑢹𑣉 𑣌𑣎𑣂 𑣔𑣉 𑣁𑣚𑣉 𑣎𑣕𑣂 𑣜𑣂𑣆𑣊𑣈𑣖𑣈.

𑢨𑣒𑣄 𑣌𑣉 𑣓𑣈𑣚𑣕𑣈 𑣁𑣚𑣉𑣖 𑣁𑣀𑣆𑣚𑣈𑣓,

𑢮𑣘𑣂𑣑𑣁 𑣌𑣅𑣕𑣈 𑣔𑣉 𑣁𑣚𑣉𑣖 𑣞𑣈𑣞𑣈𑣓.

𑢳𑣈𑣓𑣈𑣚 𑣖𑣈𑣑𑣕𑣈 𑣔𑣉 𑣁𑣚𑣉𑣖 𑣘𑣞𑣈𑣓,

𑢾𑣉𑣗𑣈𑣓 𑣕'𑣄 𑣜𑣈 𑢶 𑣌𑣉 𑣁𑣞𑣈𑣓.

𑢨𑣒𑣄 𑣌𑣉 𑣓𑣈𑣚𑣕𑣈 𑣗𑣃𑣑𑣔𑣂 𑣈𑣕𑣉𑣈 𑣖𑣈,

𑢷𑣛𑣂𑣎 𑣕𑣈𑣅𑣄 𑣌𑣉 𑣌𑣂𑣏𑣂𑣚 𑣈𑣛𑣄𑣁𑣈 𑣖𑣈.

𑢺𑣄𑣂 𑣘𑣈𑣜𑣈𑣄 𑣎𑣉𑣊 𑣎𑣉𑣖𑣄 𑣎𑣉𑣖𑣈𑣖𑣈,

𑢮𑣉𑣗𑣉𑣜𑣔𑣉𑣞𑣂 𑣔𑣉 𑣌𑣍𑣄 𑣋𑣈 𑣖𑣈𑣓𑣈𑣖𑣈.

𑢨𑣒𑣄 𑣌𑣉 𑣓𑣈𑣚𑣕𑣈 𑣞𑣗 𑣈𑣕𑣉𑣈 𑣖𑣈,

𑢶'𑣄 𑣘𑣆𑣒𑣂 𑣌𑣉𑣜𑣈 𑣈𑣓𑣁 𑣁𑣋𑣃𑣆 𑣖𑣈.

𑢹𑣂𑣚𑣁 𑣞𑣚𑣁 𑣚𑣈𑣌𑣁 𑣉𑣌𑣉𑣅 𑣌𑣎𑣂𑣅𑣁 𑣖𑣈,

𑢦𑣒𑣂𑣌𑣁 𑣚𑣈𑣌𑣁 𑣈𑣓𑣌𑣉 𑣎𑣉𑣗𑣁𑣗𑣁 𑣌𑣉𑣖𑣈....

𑢴𑢣𑢻𑢣:- 𑢹𑣂𑣜𑣚𑣁 𑢷𑣃𑣔𑣙𑣓 𑢾𑣂𑣊 𑢹𑣈𑣞𑣄.