𑢷𑣁𑣗𑣁 𑣓𑣃𑣕𑣃𑣖 𑣁𑣓𑣑𑣉𑣄 𑢯𑣁𑣁𑣞𑣉 𑣜𑣈 𑢺𑣁𑣋𑣁𑣕𑣂𑣊

 𑢷𑣁𑣗𑣁 𑣌𑣉 𑣜𑣈𑣁𑣄 𑢳𑣃𑣕𑣃𑣖 𑣁𑣓𑣑𑣉𑣄 𑣈𑣓𑣁 𑣜𑣈𑣁𑣄 𑣈𑣞𑣒𑣈𑣎 𑣏𑣂 𑣈𑣓𑣁 𑣜𑣈𑣁𑣄 𑣜𑣂𑣌𑣈𑣎𑣉𑣌𑣁

𑢷𑣁𑣗𑣁 𑣖𑣂𑣓𑣑𑣉 𑣗𑣙𑣁𑣜𑣉𑣕 𑣔𑣂𑣞𑣃𑣖 𑣜𑣈𑣁𑣄 𑣁𑣞𑣃𑣚𑣈𑣓 𑣕𑣈𑣁𑣄 𑣎𑣁𑣊 𑣕𑣁𑣓𑣁. 𑣓𑣈𑣓𑣁 𑣗𑣙𑣁𑣜𑣉𑣕 𑣚𑣉𑣄 𑣕𑣈 𑣈𑣞𑣂𑣁 𑣚𑣈𑣌𑣁𑣓 𑣔𑣂𑣞𑣃𑣖 𑣜𑣈𑣁𑣄 𑣚𑣁𑣎 𑣁𑣞𑣃𑣚𑣈𑣓 𑣎𑣉𑣖𑣁𑣄 𑣕𑣁𑣓𑣁. 𑣓𑣈𑣓 𑣜𑣈 𑣕𑣂𑣞𑣂𑣊 𑣁𑣗𑣃 𑣁𑣔𑣂𑣗𑣁𑣞𑣂 𑢹𑣉𑣉 𑣌𑣉𑣁𑣄 𑣚𑣈𑣌𑣁𑣕𑣈 𑢷𑣁𑣗𑣁 𑣜𑣈𑣁𑣄 𑢯𑣁𑣁𑣞𑣉-𑢷𑣁𑣁𑣞𑣉 𑣜𑣈𑣁𑣄 𑣈𑣕𑣉 𑣚𑣈𑣌𑣁𑣕𑣈 𑣗𑣃 𑣓𑣈𑣚 𑣓𑣁𑣖𑣈𑣁. 𑣏𑣂𑣓𑣁𑣄 𑣏𑣂 𑢹𑣉𑣉 𑣁𑣔𑣂𑣗𑣁𑣞𑣂 𑣌𑣉𑣁𑣄 𑣖𑣃𑣌𑣙𑣅𑣁 𑣎𑣉𑣖 𑣓𑣃𑣃 𑣔𑣉 𑣖𑣃𑣓𑣃𑣆 𑣕𑣈 𑢷𑣁𑣗𑣁 𑣏𑣁𑣁𑣞𑣉 𑣚𑣉𑣄 𑣕𑣈𑣋𑣈 𑣎𑣃𑣛𑣁𑣉 𑣁𑣌𑣁𑣓𑣁. 

𑢹𑣉𑣉 𑣌𑣉𑣁𑣄 𑣈𑣕𑣉 𑣚𑣈𑣌𑣁𑣕𑣈 𑢷𑣁𑣗𑣁 𑣈𑣞𑣃 𑣔𑣂𑣓 𑣎𑣁𑣌𑣈𑣑 𑣗𑣁𑣓𑣔𑣂 𑣌𑣁𑣕𑣈 𑣜𑣂𑣌𑣈 𑣔𑣁𑣆𑣉𑣄𑣁. 𑣓𑣈𑣓𑣁 𑣜𑣂𑣌𑣈 𑣚𑣁𑣋𑣂𑣑 𑣆𑣘𑣁𑣓-𑣆𑣘𑣁𑣓 𑣙𑣉𑣜𑣁 𑣖𑣈𑣓𑣁𑣄𑣁 𑣖𑣈𑣓𑣔𑣉 𑢹𑣉𑣉 𑣁𑣔𑣂𑣗𑣁𑣞𑣂 𑣌𑣉 𑣘𑣃𑣜𑣈𑣄 𑣕𑣈 𑣁𑣅𑣁𑣜 𑣞𑣉𑣖𑣁𑣈 𑣔𑣉 𑢷𑣉𑣉𑣛𑣉 𑣕𑣈 𑢷𑣁𑣓𑣔𑣂 𑣌𑣁𑣕𑣈 𑢫𑣈𑣚 𑣞𑣂𑣜𑣖𑣁 𑣎𑣁𑣌𑣈𑣑 𑣗𑣃𑣋𑣂 𑣚𑣈𑣌𑣁 𑣜𑣂𑣌𑣁𑣈 𑣕𑣈𑣁𑣄 𑣋𑣈𑣁𑣓 𑣖𑣈𑣓𑣁𑣄𑣁. 𑣁𑣓𑣑𑣉𑣄 𑢷𑣁𑣗𑣁 𑣏𑣁𑣁𑣞𑣉 𑣜𑣈 𑣦(𑣕𑣃𑣜𑣃𑣆) 𑣏𑣁𑣓𑣑𑣃𑣄 𑣚𑣈𑣌𑣁 𑣚𑣁𑣋𑣁𑣕𑣂𑣊𑣁, 𑣈𑣓 𑣚𑣁𑣋𑣁𑣕𑣂𑣊 𑣔𑣂𑣓 𑣉𑣌𑣉𑣓-𑣉𑣌𑣉𑣓 𑣘𑣁𑣆𑣒𑣂 𑣜𑣈 𑣕𑣁𑣆𑣓𑣁 𑣈𑣓𑣁𑣗𑣃 𑣓𑣈𑣚𑣈𑣁.

𑢹𑣉𑣉 𑣌𑣉 𑢸𑣂𑣁 𑣚𑣈𑣌𑣁𑣕𑣈 𑢷𑣁𑣗𑣁 𑣌𑣉 𑣏𑣁𑣁𑣞𑣉𑣈𑣁 - 

𑢶𑣂𑣓𑣑𑣉-  '𑢫𑣉𑣛𑣁 𑢷𑣁𑣗𑣁'  𑢷𑣁𑣗𑣁 𑣏𑣁𑣁𑣞𑣉 𑣔𑣉 𑢫𑣉𑣛𑣁 𑢷𑣁𑣗𑣁 𑣁𑣈𑣕𑣈𑣋𑣈 𑣈𑣉𑣗 𑣙𑣉𑣗𑣁𑣓𑣁 𑣁𑣓𑣑𑣉𑣄 𑣓𑣈𑣓𑣁 𑣌𑣉𑣖 𑣔𑣁𑣄 𑣜𑣈𑣋𑣈 𑣙𑣉𑣗𑣁𑣓𑣁. 𑢳𑣈𑣓𑣁 𑣉𑣌𑣉𑣓𑣁 𑣋𑣂𑣕𑣂𑣚-𑣋𑣂𑣕𑣂𑣚 𑣕𑣁𑣆𑣓𑣁 𑣏𑣂 𑢴𑣁𑣄 𑣌𑣁 𑣕𑣁𑣆𑣓𑣁 𑣈𑣓 𑣚𑣈𑣌𑣁𑣓 𑣒𑣁𑣈𑣑 𑣜𑣈 𑣏𑣁𑣁𑣞𑣉 𑣙𑣉𑣗𑣁𑣓𑣁 𑣈𑣓𑣁𑣖𑣈𑣓𑣕𑣈 𑣓𑣈𑣓𑣁 𑣁𑣈𑣜 𑣕𑣈𑣋𑣈 𑣖𑣁𑣕𑣁/𑣆𑣞𑣂𑣓 𑣓𑣁. 𑢳𑣈𑣓 𑣏𑣁𑣁𑣞𑣉 𑣌𑣃𑣓𑣑𑣂 𑣏𑣁𑣁𑣞𑣉 𑣁𑣈𑣕𑣈 𑣡(𑣖𑣂) 𑣏𑣁𑣓𑣑𑣃𑣄 𑣁𑣈𑣜 𑣕𑣈 𑣈𑣉𑣗𑣉𑣄𑣁..

𑢷𑣁𑣜𑣂𑣁- '𑢹𑣈𑣜' : 𑢷𑣈𑣛𑣁, 𑣉𑣌𑣉𑣓 𑣌𑣃𑣓𑣑𑣂 𑣁𑣍𑣎𑣁 𑣔𑣁𑣄𑣉𑣄𑣁 𑣈𑣓 𑣚𑣈𑣌𑣁𑣓 𑣌𑣃𑣓𑣑𑣂 𑣌𑣉 𑣈𑣉𑣗 𑣔𑣉 𑢹𑣈𑣜 𑣉𑣄𑣁, 𑣏𑣂𑣓𑣁𑣄 𑣏𑣂 𑣖𑣂𑣞𑣁 𑣋𑣁𑣖𑣁 𑣈𑣉𑣗 𑣚𑣈𑣓 𑣜𑣈 𑣈𑣓 𑣌𑣃𑣓𑣑𑣂 𑣌𑣉 𑣌𑣁𑣁 𑣙𑣁𑣈𑣑𑣈𑣓𑣁, 𑣁𑣓𑣑𑣉𑣄 𑣌𑣃𑣓𑣑𑣂 𑣌𑣁𑣁 𑣙𑣁𑣈𑣑𑣉𑣄 𑣜𑣈 𑣗𑣁𑣗𑣁 𑣌𑣁𑣁 𑣙𑣈𑣜 𑣔𑣁𑣆𑣉𑣄𑣁. 𑢮𑣁𑣁 𑣖𑣈𑣓𑣕𑣈 𑣌𑣁𑣁 𑣙𑣁𑣈𑣑 𑣁𑣌𑣁𑣓 𑣕𑣈 𑣙𑣈𑣜𑣉𑣄𑣁 𑣈𑣓 𑣜𑣈𑣔𑣉 𑣈𑣓 𑣗𑣁𑣗𑣁 𑣎𑣁𑣊 𑣒𑣁𑣁𑣀𑣞𑣂𑣉𑣄𑣁.

𑢸𑣂𑣁- '𑢼𑣉𑣁' : 𑢸𑣂𑣂 𑣌𑣃𑣓𑣑𑣂 𑣏𑣂 𑣉𑣌𑣉𑣓𑣁 𑣏𑣈𑣕𑣁𑣓 𑣏𑣈𑣕𑣁𑣓 𑣜𑣈𑣁𑣄 𑣌𑣃𑣓𑣑𑣂 𑣜𑣈 𑢸𑣁𑣛𑣁 𑣗𑣁𑣗𑣁 𑣜𑣉𑣁𑣉𑣁𑣄. 𑢨𑣓𑣁 𑣚𑣁𑣋𑣂𑣑 𑣁𑣈𑣜 𑣁𑣈𑣜𑣕𑣈 𑢬𑣃𑣓𑣑𑣂 𑣏𑣂 𑢫𑣉𑣛𑣁 𑣜𑣈 𑢸𑣁𑣛𑣁𑣈𑣕𑣈 𑣙𑣉𑣗𑣁𑣓𑣁. 𑢸𑣁𑣛𑣁 𑣙𑣂𑣞𑣂(𑣢𑣠) 𑣔𑣂𑣓 𑣜𑣈 𑢬𑣃𑣓𑣑𑣂 𑣜𑣉𑣁 𑣚𑣁𑣋𑣂𑣑 𑣕𑣈𑣁𑣜𑣈𑣁𑣓𑣁. 𑢼𑣉𑣁 𑣚𑣁𑣋𑣂𑣑 𑣕𑣈 𑢬𑣃𑣓𑣑𑣂 𑣚𑣉𑣞𑣉𑣑 𑣕𑣈 𑣙𑣉𑣗𑣁𑣉𑣄𑣁. 𑣈𑣓 𑣏𑣁𑣓𑣁𑣗 𑣜𑣉𑣁 𑣘𑣁𑣆𑣒𑣂 𑣙𑣉𑣗𑣁 𑣔𑣁𑣆𑣉𑣄𑣁.

𑢷𑣁𑣗𑣁 𑣁𑣈𑣕𑣈 𑢯𑣁𑣇𑣚𑣂 𑣎𑣁𑣌𑣈𑣑 𑣓𑣈𑣚𑣈 𑣚𑣁𑣋𑣂𑣑 𑣆𑣘𑣁𑣓-𑣆𑣘𑣁𑣓 𑣈𑣞𑣒𑣈𑣎 𑣕𑣈𑣗𑣃 𑣞𑣉𑣖𑣎𑣁𑣉𑣓𑣁. 𑢮𑣁𑣁 𑣚𑣈𑣌𑣁 𑣏𑣂 

- 𑢷𑣁𑣗𑣁 𑣎𑣁𑣊 𑣏𑣂 𑢹𑣂𑣕𑣈- (𑣓𑣈𑣓𑣁 𑣙𑣂𑣕𑣈 𑣚𑣁𑣋𑣂𑣑 𑣉𑣁𑣄 𑣜𑣈𑣁𑣄 𑣔𑣃𑣁𑣜 𑣜𑣈 𑣋𑣁𑣚𑣁𑣊 𑣌𑣁𑣕𑣈 𑣙𑣁𑣌𑣁 𑣌𑣁𑣕𑣈 𑣌𑣉 𑣜𑣂𑣌𑣈𑣁) 𑣁𑣓𑣑𑣉𑣄 𑢯𑣁𑣒𑣃 𑣜𑣈 𑢹𑣁𑣞𑣁 𑣕𑣈 𑢮𑣁𑣚𑣉𑣖 𑣈𑣞𑣈𑣑𑣉𑣄𑣁. 𑣓𑣈𑣓 𑣎𑣁𑣚𑣉𑣖 𑣈𑣞𑣈𑣑 𑣜𑣈 𑣚𑣂𑣖/𑣗𑣈𑣋𑣈𑣓𑣁 𑣘𑣁𑣕𑣁𑣁 𑣎𑣁𑣚𑣉𑣖 𑣈𑣞𑣈𑣑𑣈𑣁 𑣎𑣁𑣁𑣓-𑣎𑣈𑣕𑣁𑣓 𑣞𑣃𑣜𑣃𑣆 𑣌𑣉 𑣁𑣚𑣉𑣌𑣉 𑣎𑣉𑣖𑣈 𑣖𑣈𑣓𑣕𑣈 𑣖𑣈𑣓𑣔𑣉 𑣘𑣃𑣜𑣈𑣄 𑣕𑣈 𑢱𑣁𑣁𑣚𑣂 𑣌𑣉𑣜𑣈 𑢺𑣂𑣖 𑣘𑣁𑣕𑣁𑣁 𑣌𑣉 𑣈𑣖 𑣖𑣂𑣞𑣁𑣈𑣁 𑣎𑣁 𑣚𑣈𑣌𑣁 𑢼𑣈𑣁𑣛𑣂, 𑢬𑣃𑣛𑣃𑣕𑣂, 𑢬𑣁𑣓𑣞𑣁𑣜𑣂, 𑣁𑣓𑣑𑣉𑣄 𑢧𑣀𑣏𑣂.

𑢩𑣖𑣉𑣓- 𑢳𑣈𑣓𑣁 𑣉𑣕𑣈 𑣗𑣂𑣕𑣈𑣜 𑣜𑣈𑣋𑣈 𑣎𑣁𑣊 𑣘𑣃𑣒𑣂𑣑𑣈𑣓𑣁.

𑢩𑣖𑣉𑣓 𑣜𑣁𑣌𑣁𑣗- 𑢯𑣂𑣖𑣂𑣕𑣁𑣊 𑣉𑣖𑣉𑣓 𑣌𑣁𑣕𑣈 𑣉𑣕𑣈 𑣁𑣈𑣕𑣈 𑣏𑣈𑣕𑣁𑣓 𑣕𑣈 𑣜𑣈 𑣓𑣈𑣚 𑣓𑣁𑣖𑣉𑣄𑣁.

𑢬𑣁𑣛𑣁𑣈- 𑣉𑣖𑣉𑣓𑣈𑣁𑣓 𑣖𑣂𑣂 𑣏𑣁𑣓𑣑𑣃𑣄 𑣏𑣁𑣓𑣁𑣗 𑣌𑣁𑣛𑣁𑣈 𑣙𑣉𑣗𑣁𑣓𑣁.

𑢫𑣁𑣏𑣂𑣈𑣉/𑢷𑣁𑣒𑣂𑣈𑣉- 𑢬𑣁𑣛𑣁𑣈𑣁𑣓 𑣖𑣂𑣂 𑣙𑣁𑣁𑣒𑣉 𑣏𑣁𑣓𑣁𑣗

𑢹𑣈𑣈𑣑-

 𑢱𑣂𑣖𑣗𑣃 - 𑢷𑣁𑣗𑣁 𑣋𑣈𑣚𑣈 𑣈𑣓 𑣁𑣈𑣜 𑣉𑣌𑣉𑣓𑣁 𑣗𑣁𑣁 𑣚𑣈𑣌𑣁𑣕𑣈 𑣁𑣇𑣜𑣂 𑣘𑣃𑣒𑣂𑣑𑣈𑣓𑣁 𑣈𑣓𑣁 𑣋𑣈 𑢱𑣂𑣖𑣗𑣃 𑣖𑣈𑣓𑣕𑣈 𑣖𑣈𑣓𑣉𑣄 𑣕𑣁𑣓𑣁.

𑢷𑣁𑣙- 𑢱𑣂𑣖𑣗𑣃 𑣁𑣈𑣕𑣈 𑣉𑣄𑣚𑣈𑣁𑣓 𑣏𑣁𑣓𑣁𑣗 𑣗𑣁𑣙 𑣚𑣈𑣌𑣁 𑣕𑣈𑣗𑣃 𑣓𑣈𑣚 𑣓𑣁𑣖𑣈𑣁 𑣏𑣂𑣖𑣂𑣕𑣁𑣊 𑣗𑣁𑣗𑣁 𑣏𑣈𑣘𑣉 𑣋𑣈 𑣁𑣓𑣑𑣉𑣄 𑣗𑣁𑣙 𑣜𑣈 𑣞𑣃𑣊𑣋𑣈 𑣓𑣈𑣚𑣉𑣄𑣁. 

𑢵𑣉𑣁- 𑢷𑣁𑣙 𑣜𑣁𑣌𑣁𑣗 𑣈𑣁𑣓 𑣏𑣁𑣓𑣁𑣗 𑣞𑣃𑣈-𑣞𑣃𑣈 𑣕𑣈 𑣗𑣁𑣗𑣁 𑣋𑣈𑣚𑣈 𑣜𑣈 𑢵𑣉𑣁 𑣘𑣈𑣜𑣈𑣄𑣈𑣓𑣁, 

𑢫𑣈𑣚𑣈- 𑢯𑣂𑣖𑣂𑣕𑣁𑣊 𑢷𑣁𑣙 𑣜𑣈 𑣌𑣁𑣓𑣕𑣈 𑣘𑣈𑣜𑣈𑣄𑣈𑣓𑣁 𑣈𑣓𑣁 𑣋𑣈 𑢫𑣈𑣓𑣈 𑣖𑣈𑣓𑣕𑣈 𑣖𑣈𑣓𑣉𑣄 𑣕𑣁𑣓𑣁.

𑢫𑣈𑣚𑣈 𑢮𑣃𑣌𑣃𑣓- 𑢫𑣈𑣚𑣈𑣁𑣓 𑣏𑣁𑣓𑣁𑣗 𑣏𑣂𑣖𑣂𑣕𑣁𑣊 𑣎𑣉𑣉 𑣘𑣁𑣌𑣉𑣛𑣉 𑣆𑣑𑣂𑣉𑣄𑣁 𑣁𑣓𑣑𑣉𑣄 𑣋𑣈𑣚𑣈 𑣞𑣃𑣈𑣕𑣈 𑣉𑣕𑣈 𑣘𑣁𑣁 𑣕𑣈 𑣎𑣃𑣌𑣃𑣓𑣈𑣓𑣁.

𑢶𑣁𑣕𑣁- 𑢫𑣈𑣚𑣈 𑣎𑣃𑣌𑣃𑣓𑣈𑣁𑣓 𑣏𑣁𑣓𑣁𑣗 𑣞𑣃𑣈𑣕𑣈 𑣎𑣉𑣉 𑣜𑣈𑣁𑣄 𑣜𑣉𑣊 𑣗𑣉𑣔𑣉𑣚 𑣆𑣑𑣂𑣓𑣁 𑣏𑣂 𑣞𑣁𑣞𑣁𑣊 𑣆𑣑𑣉𑣄𑣁 𑣈𑣓𑣁𑣋𑣈 𑣖𑣁𑣕𑣁𑣉𑣄 𑣕𑣁𑣓𑣁 𑣖𑣈𑣓𑣕𑣈 𑣏𑣂𑣜𑣋𑣁𑣚𑣉𑣄𑣁.

𑢦𑣜- 𑢾𑣉𑣗𑣈𑣓 𑣋𑣈𑣚𑣈 𑣌𑣉 𑣞𑣁𑣞𑣁𑣊 𑣓𑣈𑣚 𑣓𑣁𑣖𑣈𑣁𑣓 𑣏𑣁𑣓𑣁𑣗, 𑣞𑣃𑣈 𑣕𑣈 𑣘𑣁𑣕𑣁𑣁 𑣌𑣉 𑣞𑣁𑣞𑣁𑣊𑣉𑣄𑣁. 𑣓𑣈𑣌𑣁 𑣓𑣈𑣚𑣈𑣁𑣓 𑣏𑣁𑣓𑣁𑣗 𑣌𑣁 𑣆𑣜𑣈 𑣜𑣈𑣔𑣉 𑣗𑣁𑣗𑣁 𑣜𑣉𑣏𑣉𑣑 𑣘𑣁𑣁 𑣕𑣈 𑣞𑣈𑣞𑣈𑣓𑣁, 𑣆𑣖𑣕𑣁𑣊 𑣆𑣜 𑣚𑣁𑣋𑣂𑣑 𑣈𑣞𑣃 𑣙𑣉𑣚𑣉𑣌𑣉𑣏𑣉 𑣋𑣈𑣁 𑣏𑣂𑣓𑣁𑣄 𑣖𑣈𑣓𑣕𑣈 𑣏𑣂 𑣋𑣈𑣚𑣈 𑣜𑣈𑣁𑣄 𑣑𑣁𑣓𑣒𑣂𑣑 𑣜𑣈 𑣉𑣑𑣉𑣄𑣁 𑣁𑣓𑣑𑣉𑣄 𑣆𑣜 𑣆𑣖𑣕𑣁𑣊 𑣎𑣁𑣁 𑣌𑣉𑣜𑣈 𑣋𑣈 𑣉𑣑𑣉𑣄𑣁.

𑢡𑣒𑣂- 𑢮𑣂𑣚𑣂𑣊 𑣗𑣁𑣗𑣁 𑣔𑣉 𑣁𑣒𑣂 𑣜𑣈 𑣕𑣉𑣚𑣉𑣄𑣁 𑣈𑣓𑣁 𑣖𑣈𑣓𑣕𑣈 𑣆𑣜 𑣆𑣖𑣕𑣁𑣊 𑣋𑣈 𑣎𑣂𑣚𑣂𑣊 𑣕𑣈 𑣘𑣁𑣓𑣕𑣂 𑣌𑣁𑣓𑣕𑣈 𑣈𑣖𑣉𑣄𑣁 𑣏𑣂𑣓𑣁𑣄 𑣏𑣂 𑣕𑣉𑣚 𑣕𑣁𑣓 𑣜𑣈 𑣎𑣈𑣕𑣁𑣓 𑣙𑣉𑣚𑣉𑣌𑣉𑣏𑣉 𑣌𑣉 𑣁𑣚𑣉𑣌𑣁 𑣙𑣉𑣗𑣁𑣓𑣁, 𑣁𑣒𑣂 𑣞𑣁𑣗 𑣜𑣈 𑣗𑣁𑣜 𑣞𑣁𑣗 𑣋𑣈 𑣈𑣖𑣉𑣁𑣄. 𑣁𑣓𑣑𑣉𑣄 𑣕𑣁𑣜𑣁 𑣔𑣉 𑣁𑣒𑣂 𑣜𑣈𑣁𑣄 𑣕𑣉𑣚 𑣌𑣁𑣌𑣉 𑣋𑣁𑣓𑣈𑣁 𑣖𑣈𑣓𑣕𑣈 𑣗𑣂𑣛𑣁 𑣌𑣉 𑣕𑣉𑣚𑣈𑣁. 𑣘𑣁𑣆𑣒𑣂 𑣚𑣁𑣁𑣜 𑣚𑣁𑣋𑣂𑣑 𑣕𑣈 𑣁𑣒𑣂 𑣞𑣁𑣗 𑣋𑣈 𑣘𑣃𑣜𑣈𑣄 𑣕𑣈 𑣗𑣃𑣋𑣂𑣓𑣁 𑣏𑣂𑣓𑣁𑣄 𑣏𑣂 𑣓𑣈𑣓𑣁 𑣕𑣁𑣖 𑣋𑣁𑣞𑣁𑣜 𑣆𑣖𑣕𑣁𑣊 𑣁𑣍𑣎𑣁 𑣘𑣁𑣆𑣒𑣂 𑣙𑣉𑣗𑣁𑣓𑣁.

𑢷𑣂𑣛𑣁/𑢷𑣂𑣛𑣈- 𑢱𑣃𑣊𑣋𑣃𑣂 𑣗𑣁𑣗𑣁 𑣏𑣂 𑣘𑣃𑣜𑣈𑣄 𑣉𑣌𑣉𑣓𑣁 𑣌𑣁𑣁 𑣙𑣁𑣜𑣁𑣈𑣓𑣁 𑣈𑣓 𑣚𑣈𑣌𑣁𑣓 𑣗𑣁𑣗𑣁 𑢷𑣂𑣛𑣁 𑣜𑣈 𑣕𑣉𑣚𑣉𑣄 𑣁𑣓𑣑𑣉𑣄 𑣈𑣓𑣁 𑣎𑣁𑣁-𑣎𑣈𑣕𑣁𑣜𑣈 𑣈𑣖𑣉𑣄𑣁. 𑣈𑣓𑣁 𑣜𑣈 𑣖𑣉𑣈-𑣕𑣃𑣜𑣃𑣆 𑣞𑣁𑣗 𑣚𑣈𑣌𑣁 𑣈𑣖𑣉𑣄𑣁.

𑢾𑣁𑣜𑣁𑣆- 𑢷𑣁𑣗𑣁 𑣞𑣁𑣜𑣁𑣆 𑣓𑣈𑣓𑣁 𑣔𑣉 𑣘𑣂𑣂 𑣌𑣃𑣓𑣑𑣂 𑣜𑣈𑣁𑣄 𑣗𑣁𑣗𑣁 𑣌𑣉 𑣖𑣂𑣑 𑣕𑣁𑣄 𑣜𑣈 𑣜𑣂𑣌𑣁𑣈 𑣕𑣈𑣁𑣄 𑣒𑣁𑣈𑣑 𑣕𑣁𑣓𑣁 𑣉𑣌𑣉𑣓𑣁 𑣏𑣂 𑣌𑣉𑣚𑣉𑣖 𑣌𑣃𑣒𑣂𑣜𑣈 𑣕𑣁𑣆𑣓𑣁. 

𑢬𑣉𑣚𑣉𑣖- 𑢷𑣁𑣗𑣁 𑣞𑣁𑣜𑣁𑣆 𑣌𑣉 𑣌𑣉𑣚𑣉𑣖 𑣜𑣈𑣁𑣄 𑣌𑣃𑣒𑣂-𑣖𑣃𑣚𑣂 𑣜𑣈 𑣕𑣁𑣆𑣓𑣁 𑣏𑣂𑣓𑣁𑣄 𑣏𑣂 𑣕𑣁𑣚𑣁 𑢷𑣁𑣗𑣁 𑢵𑣁𑣖 𑢫𑣁𑣞𑣁𑣜 𑣚𑣁𑣋𑣂𑣑 𑣕𑣁𑣆𑣓𑣁 𑣁𑣓𑣑𑣉𑣄 𑣞𑣁𑣜𑣁𑣆 𑣌𑣃𑣒𑣂-𑣖𑣃𑣚𑣂 𑣜𑣈 𑣈𑣓𑣁 𑣖𑣈𑣓𑣕𑣈 𑣕𑣁𑣆𑣓𑣁 𑣏𑣂𑣁𑣓𑣄 𑣏𑣂 𑣕𑣁𑣖 𑣆𑣖𑣕𑣁𑣊 𑣗𑣁𑣗𑣁 𑣘𑣂𑣂 𑣕𑣈 𑣁𑣚𑣉𑣌𑣁 𑣘𑣂𑣕𑣂𑣑 𑣈𑣑𑣁𑣄𑣁𑣓𑣁. 𑢬𑣉𑣚𑣉𑣖 𑣜𑣈𑣁𑣄 𑣜𑣈𑣁𑣄 𑣏𑣂𑣖𑣂𑣓𑣁𑣊 𑣖𑣁𑣁𑣓-𑣖𑣁𑣓𑣁𑣕𑣂𑣊 𑣖𑣈𑣓𑣁𑣄𑣁 𑣏𑣂𑣚𑣂𑣌𑣈 𑣏𑣂 𑢯𑣉𑣘𑣉𑣚 𑣌𑣁𑣕𑣈 𑣘𑣁𑣜𑣉𑣖, 𑢷𑣂𑣕𑣈𑣜 𑣜𑣈 𑢬𑣁𑣜𑣌𑣁𑣑 𑣖𑣁𑣓𑣁 𑣋𑣈𑣁.

𑢵𑣁𑣖 𑢫𑣁𑣞𑣁𑣜- 𑢹𑣁𑣕𑣃𑣜𑣈 𑢾𑣂𑣖𑣌𑣉 𑣜𑣁𑣄(𑣢 𑣘.𑣖) 𑣁𑣈𑣕𑣈 𑣞𑣈𑣕𑣁𑣄 𑣎𑣁𑣌𑣈𑣑 𑢷𑣁𑣗𑣁 𑢵𑣁𑣖 𑣋𑣁𑣞𑣁𑣜 𑣚𑣁𑣋𑣂𑣑 𑣌𑣉 𑣘𑣁𑣆𑣒𑣂𑣁, 𑣏𑣂𑣓𑣁𑣄 𑣏𑣂 𑣞𑣂𑣊𑣋𑣂 𑣁𑣓𑣑𑣉𑣄 𑢷𑣁𑣗𑣁 𑣆𑣜 𑣁𑣓𑣑𑣉𑣄 𑣈𑣒𑣁𑣄 𑣈𑣒𑣁𑣄 𑣘𑣁𑣆𑣒𑣂 𑣜𑣈 𑣁𑣌𑣉 𑣞𑣈𑣓𑣉𑣄𑣁.

𑢬𑣈𑣕𑣉- 𑢵𑣁𑣖 𑣋𑣁𑣞𑣁𑣜 𑣏𑣁𑣓𑣁𑣗 𑢸𑣈𑣒𑣈𑣄 𑣁𑣓𑣑𑣉𑣄 𑢷𑣁𑣗𑣁 𑣕𑣁𑣓𑣋𑣁𑣈 𑣚𑣁𑣋𑣂𑣑 𑢬𑣈𑣕𑣉 𑣞𑣁𑣘𑣁𑣈𑣕𑣈 𑣙𑣉𑣗𑣁𑣓𑣁, 𑢯𑣂𑣓𑣁𑣄 𑣏𑣂 𑣞𑣁𑣘𑣁𑣈𑣓 𑣏𑣁𑣓𑣁𑣗 𑣈𑣓𑣁 𑢷𑣁𑣓𑣑𑣂 𑣗𑣁𑣆𑣉𑣄𑣁.

𑢯𑣁𑣇𑣚𑣂-

𑢷𑣁𑣓𑣔𑣂/??-

𑢷𑣁𑣗𑣁 𑣌𑣉 𑣜𑣈𑣁𑣄 𑣓𑣂𑣃𑣕𑣃𑣖:

𑣡.𑢮𑣁𑣜𑣚𑣂 𑢷𑣁𑣗𑣁

𑣢.𑢮𑣂𑣜𑣈 𑢷𑣁𑣗𑣁

𑣣.𑢺𑣁𑣑𑣃 𑢷𑣁𑣗𑣁

𑣤.𑢫𑣉𑣛𑣁 𑢷𑣁𑣗𑣁

𑣥.𑢾𑣁𑣜𑣎𑣉𑣖 𑢷^𑣙 𑢷𑣁𑣗𑣁

𑣦.𑢦𑣓𑣔𑣂 𑢷𑣁𑣗𑣁

𑣧.𑢺𑣁^𑣙𑣜 𑢷𑣉𑣎𑣉𑣓𑣁 𑢷𑣁𑣗𑣁

𑣨.𑢴𑣄 𑢱𑣃𑣗𑣃𑣆 𑢷𑣁𑣗𑣁

𑣩.𑢹𑣁𑣖𑣗𑣁𑣚 𑢷𑣁𑣗𑣁

𑣡𑣠.𑢼𑣁𑣎𑣁𑣖𑣁𑣆 𑢷𑣁𑣗𑣁

𑣡𑣡.𑢡𑣞𑣃 𑢷𑣉𑣎𑣉𑣓𑣁 𑢷𑣁𑣗𑣁

𑣡𑣢.𑢾𑣁𑣘𑣁 𑢷𑣉𑣎𑣉𑣓𑣁 𑢷𑣁𑣗𑣁

𑣡𑣣.𑢷𑣂𑣚𑣁𑣕𑣂 𑢷𑣉𑣎𑣉𑣓𑣁 𑢷𑣁𑣗𑣁

𑣡𑣤.𑢷𑣁𑣜𑣃 𑢯𑣉𑣌𑣁𑣄 𑢷𑣁𑣗𑣁

𑣡𑣥.𑢱𑣉𑣋𑣉𑣜 𑢷𑣁𑣗𑣁

𑣡𑣦.𑢬𑣂𑣕𑣈𑣞𑣁𑣛𑣂 𑢷𑣁𑣗𑣁

𑣡𑣧.𑢯𑣂𑣊𑣋𑣃𑣛𑣂 𑢷𑣁𑣗𑣁

𑣡𑣨.𑢾𑣁^𑣙𑣚 𑢷𑣁𑣗𑣁

𑣡𑣩.𑢬𑣉𑣅𑣁 𑢷𑣁𑣗𑣁

𑣢𑣠.𑢫𑣉𑣅𑣁𑣗𑣚𑣂 𑢷𑣁𑣗𑣁

𑣢𑣡.𑢲𑣂𑣌𑣈𑣜 𑢷𑣁𑣗𑣁

𑣢𑣢.𑢶𑣁𑣜𑣕𑣉 𑢷𑣁𑣗𑣁

𑣢𑣣.𑢬𑣁𑣓𑣁𑣆𑣚𑣂 𑢷𑣁𑣗𑣁

𑣢𑣤.𑢯𑣂𑣛𑣂 𑢬𑣒𑣁 𑢷𑣁𑣗𑣁

𑣢𑣥.𑢬𑣉𑣞𑣉𑣖 𑢷𑣁𑣗𑣁

𑣢𑣦.𑢷𑣉𑣁 𑢡𑢡 𑢷𑣁𑣗𑣁

𑣢𑣧.𑢷𑣁𑣑𑣏𑣉𑣖 𑢷𑣁𑣗𑣁

𑣢𑣨.𑢮𑣁𑣓𑣃𑣖 𑢷𑣁𑣗𑣁

𑣢𑣩.𑢬𑣁𑣌𑣜𑣂 𑢷𑣁𑣗𑣁

𑣣𑣠.𑢷𑣁𑣞𑣖𑣉𑣕𑣂 𑢷𑣁𑣗𑣁

𑣣𑣡.𑢡𑣜𑣂𑣚 𑢷𑣁𑣗𑣁

𑣣𑣣.𑢾𑣈𑣊𑣋𑣈𑣚 𑢷𑣁𑣗𑣁

𑣣𑣤.𑢬𑣁𑣛𑣃𑣁 𑢬𑣁𑣓𑣂 𑢷𑣁𑣗𑣁

𑢯𑣂𑣜𑣋𑣚;- 𑢬𑣁𑣓𑣁𑣆𑣚𑣂 𑢷𑣁𑣗𑣁 𑣔𑣉 𑣑𑣂𑣈𑣊 𑣌𑣈^𑣙𑣕𑣈 𑢳𑣃𑣆 𑣜𑣈 𑢮𑣉𑣓𑣑𑣂𑣞 𑢼𑣉𑣋𑣁 𑣚𑣁𑣋𑣂𑣑 𑣘𑣁𑣆𑣒𑣂 𑣜𑣈 𑣙𑣃𑣎𑣃𑣄𑣁𑣁.